Kihinatthi ohimya itthu sintxène, kinphavela wàkhomasa atthu othène ari vava n’àle anniwiriayana ari mapuro ovirikana a mulaponi mwahu walà ilapo sokhopela: othene mòni ni musura wa mphento.
Olelo va makhalelo a eroho ahu tophutuleleya: wókhala mwa hiyo wíniwa murima ni wunla nave-tho otthapa, otteliwa murima n’ohakalala khuluwiru. Makhalelo ala a erutthu ni eroho anìraneya mwaha wa sòkhumelela sa mulaponi mwahu. Wíniwa murima ni wunla hatá osikula mwaha wa itthu sinikhumelela mahiku ahu ala. Tthiri nawehaka enamuna wìriwawe mwathanle, wìvakasiwa atthu, wìyiwa ivòtu hatà ophavela okhala mulipa-òxintta anamwi anamuntxène ehóthanlale etthu yòthananiha ni yòphweliha maru. Vekékhayi, mwathanle a mitano khivanrérela wihaniwa mwathanle, nihana wàvya nsina mwaha wòwi wari-vo wìyiwa pahi. Ela etthu enniripiha murima, yèyo enirérela wira ehikhumelele-tho mulaponi mwahu. Siso ninniwumpererya ale anira mpanttta wa mwàlano onimwetetela mwthanle wira ephaveleke ovara muteko ntoko simphwanelaya. Wàle yòkotthiwe mwaha wa mwatahnlène yòla, ninninvekela Muluku wira ávahe omumula ni murettele.
Nto etthu enithukumannye va nira nòttikhiwa wásomi a exikola y’Èmakhuwa Consultoria & Serviço namukhuluwiru otthapela iyakaha pili okhuma vávale nipatxenryahu omulepa ejornale Wòniherya, okhanle muhula mikhora a olaleya ihapari variyari va nttava na mulaponi mwahu. Mwèri ola nòpatxèrya mwàkha wa néraru. Tivò hiyo nri òtteliwa murima, òtthapa n’òhakalala vantxène. Otteliwa nno murima onòniherya wira nnamwi sinithowaka ikaruma, nikuru n’ótthuna wa murohoni mwahu, olelo ninnitthapela muteko ole, okathi wapatxeryahu, wákhala ntoko oloha. Tthiri, okhuma mahiku yèttaka muloko ni mathanu namosa na outupuru a mmwaisuri, eyó piyó, iyakha ikonto pili ni iyakha miloko mili n’emosa, wahiso, 2021, hiyo nahipatxèrya olaleya ihapari ni nttava n’Emakhuwa. Nawehiwaka okathi ole nakhala ntoko ananvahuwa, masi olelo ninnihimya nihóvaka wira etthu evanryahu n’enivarahu ti yophwanelela. Sovira iyakha pili solikanene, mpakha va nimpatxeryahu mwàkha wa néraru, khula mwèri nikumiheryaka ihapari vohihiyererya. Kahiyó etthu yòkhweya, nto mwaha wa nthiti nòphavela okeleliherya oholo ephattu ahu, yonipixa olelo vava. Etthu eniphavelahu wira nloko namakhuwa nisuweliwe mulaponi ntoko vanisuweliwaya maloko makina. Wira nisuweliwe, nihana oweretha mupuwelo ahu ni ephattu ahu. Ti mana Wòniherya okhanlyawe ehuhu enòniherya murerelo wa ephattu ni solimalela s’Amakhuwa.
Olelo nàtthapaka kahiyo nnira wira nóphiya okhomoni, hòye. Nto nimphavela wòniherya wira nlelo ninvira niwanelaka wunnuwa wa nloko ni ephattu y’Amakhuwa. Nósuwela wira makhuru mantxène anniphavela onikumiherya ekhotto wira enotxeihe, nto hiyo nosuwela etthu eniphavelahu. Vekékhayi, mwa iyakha iya pili, kharere atthu ni makhuru yanivekela wira nihiye olepa ni olaleya ephattu ahu, nto mwaha wophenta wahu ephattu ahu hiyo nókhotta. Tivò vanittottopahu wira hiyo naxinene nttava ni ephattu ahu, khanimphavela wotothiwa nnakhala opotthiwa.
Okathi ola ti woxukhuru: wàxukhuru atthu othène ale anikupali ni aniroromela muteko ahu ola. Opatxerya wene ale anira mpantta wa Wòniherya, ntoko anamalepa, anamalaleya, anamihupi ni miteko mikina sovirikana. Waxukhurela-tho othène anira mpantta wa Emakhuwa Consultoria & Serviço okhanle ttòtto ni nivatta ninlipanawe Wòniherya. Omuxukhurela munna Padre Kantífula, mukhulupale a Emakhuwa Consultoria & Serviço, nale othene anvaranawe muteko. Walipiherya murima ale anira mpantta wa Wòniherya wira ehótxeye. Nnamwi miteko sihirere, ahana wívaha okathi wo wira mpantta wa nikhuru nla. Wavekela-tho ale anittikhiwa olelo, vantxenexa variyari vonamalaleya ihapari (ejornalista) wira okhalana nipuro nowòniherya ele enisuwelaya, elepaka iye sinónaya hata sinupuwelaya ni okumiherya mu jornale Wòniherya.
Wòkiseryani waxukhurela ale othène aniphenteleya ni anisiveliwa ni Emakhuwa n’ephattu aya wira yíreke siso. Navekelaka wira enikhaliherye mwa sothène iye siniweryaya; okhuma miruku, mikhaliheryo variyari va ikaruma hatà muhakhu. Nyuwo munittikhiwa olelo va ninnophentelani orériwa ni ohakalala mahiku mantxène. Othene Muluku orériheni ni oréreleni murima.
Othene ahu nnotthapa n’òhakalala. Tivò, othene ahu nòtthapeleya.
Kòxukhuru vantxène!
Wamphula, mahiku yéttaka miloko mili nnimosa, mwèri wanamuloko (outupuru), mwàkha wa 2023. Vireye siso!
Pe Bonifácio Júlio Raça
