Mòlemeliheya Tiretòre a Emakhuwa Consultoria e Serviços Mophenteya Anamasomiha óthène
Mòttittimiheya anamalattuliwa Axinn’aka óthène muri vàva
Wòpatxeryani wa muhupi ahu ola nimmphavela wòvahereryani makhomaso a niphento, nyuwo óthène muri vàva.
Mwa nsina n’ásomi óthène amalinhe oxutta nttàva n’Èmakhuwa okhumela mmwaisana mpakha mitano va nòttéliwa murima mwaha wa murérelo ola nivahiwàhu wìra nixutté nttàva ninlavulaxiwa elapo yòmosampìkhi, Emakhuwa. Khivarère onittapittela varóhoni vahu.
Nipatxeryaka osoma vákhala wìra khivàweryaneya ophiya okhomoni wóxutta, mwaha w’ettima yàvahiwàhu. Mamwìxuttihi ahu Namukuttho Kant de Voronha ni muxirikha Sualehe Horta khanrère otumererya yàsomihasaka Emakhuwa, khivammumuleya. Masi okhala wìra osomiha waya onnitthukula murú, tivó vanikhwenlyàya mpakha opixa okhomoni wósoma wahu. Sìso, nòtthapela-tho mukhaliheryo nivahiwàhu.
Vano nòsuwela tthiri wìra Emakhuwa Consultoria e Serviços exikola emosa enàkhaliherya amwávano antxène okhumela mwàkha wa 2020 khuyakhweiherya munnuwelo aya. Ni iyàkha tthàru pàhi, sinvira okhumela vale etthukuliwàya exikola ela, vanóneya wìra mùpuwelo ola wòtthaveya vantxène. Vahàri sìso miyo kinsoma va, n’ákina ahiwenrye orwa olelo nlelo khinákela oxutta emakhuwa. Nyuwo muhisomme Emakhuwa rwàni, mwàkuvaka. Oxutta khommurakaliha mutthu, oninnuwiha emutthu ni ephattu ahu. Ole onthanya nttàva nawe owo òrakala vantxène, khomalenle.
Axinn’aka, mukupali tthiri wìra sóthène sixuttihiwàhu sinònikhaliherya ovara muteko ni mukhalelo wòsuwela, nttittimiho ni wìlipiherya nikhaliheryaka wunnuwiherya elapo yóthène, vantxénexa Wámphula nno. Hi nòpulukhi sàna ni khuyòniherya oxonela wahu makhalelo òlavula ni olepa Emakhuwa.
Nòkhalano itthu sintxène sóhimya, masi mólumo anninihalela khuyanitipa mwaha wòhakalala wahu ohimphimeya. Khalayi, nihinatthi wìlepiha, vàri ntoko oloha, masi olelo ehònihereya ekékhayi. Nòhakalala nnìra nla nùlupalexa. Ohòlo Emakhuwa Consultoria e Serviços. Vèkékhayi nttàva ephattu ahu.
Mwaha wòniwiriyana wanyu, ninnòxukhurelani vantxène.
Wámphula, mahiku miloko mìli ni nnimosa, mwèri wa namuloko, mwàkha wa ikonto pìli ni miloko mìli ni tthàru.
Asomi a nttàva na Emakhuwa!
