
Kant de Voronha
Pursòre onivara muteko elapo Yòmosampìkhi, tule onrowa ohinsuwelàwe. Khahi ole onìvonyerya mpareya àvyávyaka mathala òrakamela, masi mulipa-òtharamula orumattha ni iròho. Owo onnivira mmásini mòsareya mawimpi mwaha wa makhalelo awe a mmawàni, othoiwa ni ohitxaliwa, khuyarowa apattinhène ivèla sawe wìra axintte othanyiwa ni ohasuwa. Pursòre owo mulipa òvoliwa, masi orina mettó sawe sòwìthipela vatthayani nave eròho awe enùpuwelela wìtholela yòwìkhúriha khula nihiku vamosá ni amusi awe, anaxikola awe, anammuttettheni awe, hatá tho axitìthi awe.
Omosampìkhi, epursòre okapatta okathi muntxène wa nihasu, ohikhala exariya, osommwa sàna ohinwerya omutaphula mutthu masi onintxererya okhala khapuro a mulaponi. Tthiri, mapursòre mantxène a mulaponi mwahu mu khanwerya wìxùpuwela yìphavelelaka otaphuwa waya walá wàtaphula atthu akina ahinwerya wùpuwelela mataphuwelo òphwanelela. Nòne wìra, mapursòre mantxène anùpuwela wìra muteko aya avahiwe ni Frelimo. Khanwerya ovirikanyiha epartìtu ni Estàto.
Pursòre Omosampìkhi, vantikinihàya, onnixuttiha murérelo wósoma, masi khontthariha ensomihàwe, khuhinóneya mmaithoni mwàle yákela wònelaka vatthu makhalelo óthène. Masi pursòre owo, okhala wìra muteko awe khonkhuma etthu enwerya omukhúriha, nakhotto ntero òwìmáliha orimwi onasaryeru mirala sa masòso awe, onthipelela orowa ohòlo, akupaliki wìra osuwela wawe pàhi, onòmutthukulela mikhora sintxène omuhòli.
Òvoliwène, áyo, masi khahi ovoliwe etalá yòlya etthu pàhi walá ohákhela musurukhu wòphwanelela — siri, vòhànyiheriwa, mikatxamiho sòtepaxa owalamela simphwanelela wàkuveliwa wùpuwelela. Owo ovoleliwe osuwela ni nttittimiho vamosá ni makhalelo makina ankela omukhweiherya ovara muteko awe ni omutthu wóthène. Pursòre owo onniloherya nihiku ninkelàwe orumèla exìxi owanelaka okhutureya pàhi, masi tho ntoko ekaruma enkela omukhaliherya oxintta mukhalelo awe wa khula nihiku. Onniloherya esàla yósoma ehinkela okhala ixiri xexé pàhi, masi tho opuro onkela orumèliwaka n’atthu óthène wìra exutte mataphuwelo aya ni ophwanya osuwela wèkékhayi.
Masi pursòre òmosampìkhi khonwanela omaliha etalá ya yòlya pàhi. Onniwanela tho etalá yùlupalexa enimuhùrya muróhoni mwawe khula nihiku onrowàwe omutekoni: wàxuttiha anaxikol’awe owerya owanela exariya ni murettele omphwanelela otaphula omutthu ahu. Okathi muntxène, owo ti muthuku ompatta vèpiphini va makhalelo òwalamela anònaneya mulaponi mwahu. Khula núlumo ninxuttihàwe ehulelo yùlupale empattiha muthuku wa muróhoni mw’atthu antxène anloherya otaphuwa waya ni otthokiha emutthu ya omuhòli. Owo òsuwela wìra muteko awe mùlupalexa okhala wìra mwa yòwo tonkhumelelàya oxutta ni nroromelo vamosá ni wópowa.
Evarelo awe muteko ti wòtiripana ni wòvitikana. Onimwi akuxaka osuwela wawe masi tho onòneliwa vatthu omuhúryaka màru. Nno akawaka osuwela, onníweha okhala mutthu ohinóneya n’anamuntxène. Pursòre òmosampìkhi khonsuwelaxa onikelàwe ayo, masi tho onniteka iponti (mithato) sihinóneya seiyo sinikhweiherya olupanya ottuli wa masòso ni omuhóli oriwo nroromelo na otaphuwa ni exariya vamosá ni murettele ni othawali.
Nave sìso owo onnètta, khula nihiku, owehaka ohòlo ùminhe murima. Owo mulipa-ómisa epyó. Òsuwela wìra nnàmwi mawimpi emurukureryaka, mmiso awe onòkhalakhala omelé, wunnuwe, orelane ni wìmihe mihokorokho sinkela wàvoniha atthu antxène omuhòli.
Ekina nkihimmye!