
Nikano 56 (Ikano sòwúlàna)
- Ihakhi ni ipewe sa khula mutthu ti sòvareya ovinyawene, sinàkhanyererya anamitthenkeso sa elapo ni a axinène, sinlipiheriwa ni estàto ni sihàna ottharihiwa muhina mwa Malamulo a Elapo ya Omosampìkhi ni malamulo makina.
- Mwèttiheryo wa ihakhi ni ipewe onnikhala wòwuntériwa mwaha wa okhapeleliwa ihakhi sikina walá mirérelo sinikhapeleliwa ni Malamulo a Elapo ya Omosampìkhi.
- Nlamulo nókhala wòwunntèrya ihakhi, ipewe ni iphurelo mwa makhalelo òsuwelihiwa Munlamuloni nòhólela.
- Makhòttiheryo òlamuliwa wa ihakhi ni ipewe ahàna wíriwa wa sóthène ni wòhivareya ni khakhanle òliveliwa okathi ovinre.
Nikano 57 (Ohiliveliwa okathi ovinre)
Mwa Elapo ya omosampìkhi, malamulo anórowa oliveliwa wa okathi ovinre vakhala wìra anammuttettheni ni atthu akina òlamuliwa anórowa ophwanya murérelo.
Nukano 58 (Ehakhi ya Oliviwa ni yóvara ya estàto)
- Wa atthu óthène annisuweleliwa okhalana ehakhi ya olokiha, ntoko silamuliwàya, wa oliviwa musurukhu mwaha wa ohononeliwa onkela wònaneya mwa ohittharihiwa ihakhi saya sòhólela.
- Estàto tenàkhulela wa ovonya mwaha wa sóvonya sa anamuteko awe avaraka muteko, wòhintériwa ehakhi aya ya otthikela muteko, ntoko silamilwàya.
Nikano 59 (Ehakhi yòwópowa ni yòkhapeleliwa)
- Mwa Elapo ya Omosampìkhi, atthu óthène ahàna ehakhi yòkhapeleliwa ni khàvo onikela otthukeliwa onarowa ophukiwa mulattu vahikhanle ntoko silamuliwàya.
- Namukaxariwa ohàna wìkupali ohittheka mpakha osommwa yòlamuliwa yòmaliha.
- Khàvo nammuttettheni okhanle òphukeliwa ovikana emàra emosá mwaha wa ovara yóttheka emosaru, nnakhala ovahiwa ehukhumu ehilempwale munlamuloni walá ni ehukhumu yótepa owereya ovikana elamuliwe okathi owo wàpakàwe yóttheka.
Nikano 60 (Mwèttiheriwo wa Nlamulo na ikhirime)
- Ohikhale mutthu oni ohukhummwe mwaha wa yóttheka ehilamuliwe okhala ekhirime wa okathi ole wàvaràwe.
- Nlamulo na Ehukhumu ninniliveliwa okathi ovinre vakhala wìra ole otthenke onóphwanya mphurelo.
Nikano 61 (Omala wa ehukhumu ni ikettelo sa okhapeleliwa)
- Sinnikhòttihiwa ihukhumu ni miyéttelo sa okhapeleliwa wòwehexexiwa walá wòhihiyereriwa ophumurya wòhimala walá wòhisuweliwa omala waya.
- Ihukhumu khasinvaheryaniwa.
- Khìvo ehukhumu entotha mutthu ohikhalana ihakhi sawe sa nammuttettheni, sa namuteko walá sa napartìtu, nave khimmukhóttiha namattheka ihakhi sawe sòhólela, wàhikhale okhòttiheriwa mwaha wa ntaphulelo na ehukhumu ni muteko wa okoha-koha wa miyéttelo seiyo.
Nikano 62 (Ophiya Otiripunàle)
- Estàto enniwèmiherya anammuttettheni ophiya otiripunàle ni enniwèmererya anamattheka ehakhi ya wìsákiha ni ehakhi ya okhaliheriwa ni oliveriwa wàphukiwaka mulattu.
- Namattheka ohàna ehakhi ya omuthanla mmansawe ole onikela omwákiha wòwi okhaliheriwe mwa mírelo sóthène sinkela ottharihiwa, onàmwi namattheka owo ohikhalanne musurukhu wòwi omwàkiherye.
Nikano 63 (Yóruma ya nlamulo ni wàkiherya)
- Estàto ennàvaha ale annèttiherya yóruma ya nlamulo, miphurelo sòrérela wa miteko saya ni enniwehaweha mwaha wa okhaliheriwa mmilattuni, ntoko etthu yòfayixa wa ohólela exariya.
- Mwa wèttiherya miteko saya ni wa otthariha nlamulo, khasintthukuliwa itukumento, sòvelèlihaniwa ni itthu sikina sivahiwe Ativokàtu ni ole onimukhaliheryàwe, wòwi omwákihe yòla walá sinìra mpantta sa muteko awe.
- Otholiwa, ovariwa walá ittharelo sikina sòlikana mukapinèti walá onivara ativokàtu sókhala sòrumihiwa ni sòlamuliwa mwa exariya ni sihàna ovariwa oryène namaphuka milattu orumme, ativokàtu ni muhóleli a mutthenkeso wa Màtivokàtu orummwale wìra mpantta, yàri yòhólela ekhanlène mwírelo wòhitthuneya onivaha ehukhumu ya otthukeliwa ovikana iyàkha pìli, wàri nthónyero onáhimya ativokàtu wìra ti yírale.
- Ativokàtu ohàna ehakhi yòlavulana ole onimukhaliheryàwe, mmansawe ni wòhàttamanasiwa, nnari owo otthukeliwène walá oheliwène nipuro n’atthu antxène walá n’atoropa.
- Nlamulo ninniwehaweha miyéttelo sikina sinònaneya mwa yóruma ya nlamulo.
Nikano 64 (Otthukiwa wa okhapeleliwa)
- Ottukeliwa wa owehererya ontthuniheriwa mwa makhalelo òlepeliwa munlamuloni, ninthónyera okathi ommalàya.
- Nammuttettheni òtthukiwa wa okhapeleliwa ohàna orúhiwa wa okathi onòniheriwa munlamuloni ottharihiwe ni alamuli a exariya, akhanle yàwo pàhi ówerya oruma otthuniherya ni otthikelihiwa mukhatteya.
- Khula mutthu òtthukeliwa ohàna oléliwa nìnánoru ni mwa makhalelo òhikatxamiheya, mwaha wa otthukeliwa wawe walá wa ovariwa ni ihakhi sawe.
- Yòlamuliwa mwa exariya enirumiha walá enitthikeliha nlamulo wa otthukeliwa ehàna ovinyawene oléliwa mmusi walá mutthu òroromeliwa ni ole otthukeliwe, àthònyalyàwe.
Nikano 65 (Miyéttelo sa muttharelo wa ekhirimi)
- Ehakhi ya wàkihiwa ni yòphukiwa mulattu mwa muttharelo wa ekhirimi khonvireliwa ni enalipiheriwa wa khula namukaxariwa.
- Mapkhukeliwo milattu mwa muttharelo wa ekhirimi anniwehiwa ni atthu óthène antthuna, ohiya wakhala wìra okhapeleliwa wa mutthu, wa amusi, wa atthu walá wa miyéttelo sórèra, walá myaha sùlupale sa ekásòpe ya anamaweha walá wa atthu óthène yèmerenrye ohilaleiwa walá olaleiwa vòhátxèrya.
- Ti sòhikhalela etthu ithónyero sòphwanyiwa mwaha wa ehukhumu, wòpopihiwa, ohóxiwa wa erutthu walá eròho ya mutthu, wìkeliha vòtepaxa mmakhaleloni mwawe ni mwa amusi awe, owannyawe, sòvelèlihaniwa walá ivánelo.
- Khiyàvo ephattu ekhanle yòkumihiwa oniphukiwa milattu, ori owerya waya olepeliwe mwa nlamulo nivinre, ohiya mwa makhalelo òwòniheriwa khalayène munlamuloni.
Nikano 66 (Ehakhi ya ohitthukeliwa)
- Wakhala otthukeliwa walá ovariwa, nammuttettheni ohàna ehakhi yòvekela okhaliheriwa wa wìnanela mwa ehakhi yòhitthukeliwa.
- Wìnanela wa ehakhi yòhitthukeliwa onniheleliwa wàphukiwaka mulattu, onèmererya mpakha mahiku mathanu ni mararu.
Nikano 67 (Ovahereriwa)
- Ovahereriwa onimwìraneya muhina mwa yòlamuliwa ni exariya.
- Olamuliwa mwaha wa ipolítika khontthuniheriwa.
- Khontthuniheriwa ovahereriwa mwaha wa ikhirimi sinlikanela mwa nlamulo na estàto onlattula ehukhumu ya wíviwa walá otthukeliwa wòhimala, walá ni khula okathi onkupaliwàya wìra namulamuliwa onórowa ovahiwa ehukhumu, ohóxiwa, vòmuhonona walá vòwereyaxa.
- Nammuttettheni a Omosampìkhi khakhanle òwòmoliwa walá òvahereriwa mwa muttetthe wa Omosampìkhi.
Nikano 68 (Ohiweheriwa mpàni ni yòvelèlihaniwa)
- Empá ni yòvelèlihaniwa walá mukhalelo mukina wa olavulihaniwa wa mékhàwe khasinweheryaniwa, ohiya mwa makhalelo òwòniheriwa khalayène munlamuloni.
- Okeleliwa mpàni ni atthu akina weyo ohitthunne ohàna okhala wa orummwa ni alamuli a exariya òtthuniheriwa, mwa makhalelo ni ntoko sòwòniheriwa khalayène munlamuloni.
- Khàvo onitthuniheriwa okela mpàni wa mutthu mukina ohiyu vòhimusuweliha munène.
Nikano 69 (Ehakhi ya okhòtta)
Nammuttettheni ókhala ókhòtta miyéttelo sihinitthariha ihakhi sawe silepeliwe mwa malamulo a elapo ya Omosampìkhi hata ni malamulo makina.
Nikano 70 (Ehakhi ya otthimakela otiripunàle)
Nammuttettheni ohàna ehakhi yòtthimakela otiripunàle mwaha wa miyéttelo sihinitthariha ihakhi sawe ni sòphavela sintthuniheriwa mwa malamulo a elapo ya Omosampìkhi hatá ni malamulo makina.
Nikano 71 (Orumèla ikomputatòre)
- Vannikhòttihiwa orumèla ikomputatòre wìra silempwe ni sireheriwe mitthaka sòsuweleleya sinìra mpantta wa miyéttelo sòrumèla walá sòwùpuwelela, sòwànyiherya walá sòwùpuwelela, wa okupalela itìni, wala wìra mpantta mpartítuni walá wa mutthenkeso wa anamuteko ni wa ohìsuweliha.
- Nlamulo ninnèmererya okhapeleliwa mitthaka sa mutthu silepiwe mukomputatóreni, makhalelo a okela mwa arumasiya a mitthaka, opakiwa hatá oruméliwa arumasiya a mitthaka walá sikina sinikhaliherya ikomputatòre ni alamuli a estàto hatá atthu akina.
- Khavantthunihiwa okela mw’àrumasiya ni mólempwa mitthaka walá mw’àrumasiya a mitthaka wìra sithurumeliwe mitthaka s’atthu akina, nnakhala ovelèliheriwa mitthaka sa mutthu wa komputatère mmosá orowaka mukina sa miteko walá mitthenkeso sòvirikana, ohiya mwa makhalelo òwòniheriwa munlamuloni walá mwa yòlamuliwa mwa exariya.
- Atthu óthène ahàna ehakhi yòosuwela mitthaka sithukumanyiwe sinewìra mpantta hatá ni oreherya.
Nikano 72 (Wuntériwa mèttiheryo a ihakhi)
- Ipewe ni iphurelo sa khula mutthu sókhala sòwuntériwa walá sòvukuliwa okathi vakhàni mwaha wòlamuliwa ekhotto, wa orukureriwa walá wa sòkhumelela sintoko sinòniheriwàya munlamuloni.
Khula okathi onònaneyàya wuntériwa walá ovukuliwa wa ipewe walá wa iphurelo, iyo sihàna mukhalelo wa sóthène ni wòhivareya ni tho sihàna ohimyexexa okathi onimalàya ni ephattu aya yòlamuleliwa.