Elapo Yòmosampìkhi
Emakhuwa Consultoria e Serviços
OTTIKHIWA WANÉTHANU NENLI
Mòttittimiheya Muhóleli a Emakhuwa Consultoria,
Mòphenteya Muhóleli a Xornàle Wòniherya,
Mòlemeliheya anamuteko óthène a ECS,
Mòni anamattikhiwa ólelo,
Nihòkhomasani anamalattuli ahu,
Wa nsina n’ásomi a nttàva na Emakhuwa, nimphavela wàkhomasa ni wàxukhurela vantxène atthu óthène arwènle wírela mpantta nìra nla nólelo. Ottikhiwa wahu nno onninithónyerya ekanyero yùlupale mwèkumini mwahu nave tho mmitekoni mwahu.
Nttàva n’Èmakhuwa nixuttihiwàhu ni mutthenkeso wa Emakhuwa Consultoria e Serviços khonixuttinhe olepa ni osoma pàhi nttàva nahu nla na ephattu, masi thó, wònihulela mikhora sawaleñye mwaha wòhiwerya wahu osiphànya khurérela mólumo a Emakhuwa.
Nòsuwela wìra nlelo kharère mulaponi mwahu atthu ahintthuna ni ahintxalela olavula, olepa ni osoma Emakhuwa. Awo annùpuwela wìra Emakhuwa khemphwanyiha muteko, wúliha murú nnari tho ákhala akina anihimya wìra Emakhuwa owereiha murú mutthu àlavulaka. Masi miyèri iya sivinre nixuttihiwaka elavulelo, elepelo ni esomelo emakhuwa, nówerya osuwela wìra vatthuva nttàva ephattu ya mutthu ni erimarima enlipiha mukhalelo wa muxovo mùlupalexa Omosampìkhi nno. Opulukhi wahu nno, wònisuweliha wìra hiyo khaninrakala tho vatthu naxutta Emakhuwa, masi nnintxererya emutthu ni munnuwelo ahu. Okhumela olelo vá, ninnisuwela wìra nnórowa nalavuleke nihòvelelaka etthu, n’atthu óthène a mulaponi mwahu, otepaxa wene ale anthanyiwa mwaha wòhisuwela Emakhuwa.
Sìso, opulukhi nttàva n’éphattu khahi wàkhelela etipolòma pàhi enòniherya omaleliha osoma, masi otthara ephiro ya muteko ni omuttu onttittimiherya ephattu ni onivuluxa muxovo w’atthu antxène ahinavàvi mmakhaleloni mwaya. Omosampìkhi nno, kharère mattàva anlavuliwa, masi Emakhuwa tetepanxe wàtta anamalavul’aya, yàwo anikonthiwa wìra annikhwaranya imilyawu thanu ni pìli mulaponi mwahu móthène. Tivó, olavula Emakhuwa otthukula mikhora sàwaliwe ni ananrima ahimphavela munnuwelo w’àtthu.
Nòtthapela mutthenkeso wa Emakhuwa Consultoria e Serviços mwaha wònihava ikuru sówerya osoma ikursu sinnikhaliha òtthukuwa murú. Nnàmwi ettiya-màru ehirère, ninnikupwalèla wìra anamuntxène annisiveliwa ni miteko sa Emakhuwa Consultoria. Nahàri nrima na xetwani sàno nriki wi Exikol’èla ehúlàna eprovínsiya yóthène.
Ale antthuna osoma wèkékhayi, muhòvelele orwá khuyasoma vanrerelàya. Hiyo va nòmaliha ettim’àhu. Murwèke mikhora sa Emakhuwa Consultoria nihòhiyeryani. Mòthapeleya óthène anyu anamuteko, anaxikola ni anamaloherya Emakahuwa Consultoria.
Nòxukhurela ni murima vamosá ni Eròho ahu yóthène!
Wámphula, mahiku mulokó ni mathanu ni maxexe, mwèri wa Outúpuru mwàkha wa ikonto pìli ni milo mìli ni iyàkha xexé.
Asomi a Nttàva na Emakhuwa
