Mahóleli a muxovo wa mapátiri ni marimwawu a Daniel Comboniano ahòniherya othunku aya ni orípiwa murima enamaxexe (14/11), oRoma, yàlepelaka mamisionário makhwàya anivara Omosampìkhi muhina mwa epuruma.puruma enònaneya mulaponi okhumela vávale vavinryàwe mwáthanle (9/10). Ewarakha elempwe ni mahóleli awo ehòniherya oxanka waya mwaha wa nnyoho ni owali wóthène onkhumelela ni mapilìsa aniwópela ni owókottha atthu, ohononiwa mirérelo s’anammawàni mpakha va vakhwíyàya atthu antxène ni akina avulalihiwe.
Ewarakha eyo, nnyoho nnònaneya mulaponi mu nòkumiherya “nthowa, okhwá, orimpwa murima ni wòva”, khuyatepiherya owàwa w’anamanloko antxène ahinòna wòwírela vo. Sìso, Mahóleli awo annàlopola mamisionáriyu anvara Omosampìkhi wìra elipiherye wìkasòpa muhina mwa sòkhumelela sóthène evaraka vamosá ni Mahóleli a ekerexa eri wenno, yàvahaka mukhaliheryo aya atthu óthène aniphavela “exariya ni ekékhayi”.
Vari sìso, Mahóleli a makhompòni annilipiherya muteko aya “onluluwana ni mukhalelo ni ekhwèli y’atthu”, vatthariheliwaka onamòna wa Daniel Comboni. Áhimya-tho wìra makhompòni àviriha iyàkha 77 okhumela vávale varwíyàya Omosampìkhi, yàrumélaka alipa-óhàwa ni ewanelaka makhalelo anluluwana ni Ehapari Yórèra. “Nihìtthaneliwa olaleya Ehapari Yórèra ya murettele ntoko ephiro emosaru emphuka makhalelo a nttittimiho ni omutthu”, àsuweliha nwarakhani mwaya.
Ohiya-tho vó, Ewarakha ya Mahóleli awo yótthoma murérelo wowunnuwiherya nroromelo ni owanela murettele vamosá ni nttittimiho. “Ninniroromela wìra okristu ni ephattu y’anamanloko omosampìkhi sinókhala mapotto ankela okhaliherya ophuka wìxùpuwela oniwerya oxintta mawòwo ala anikhumelela ni Kuvernu vamosá ni anammawàni”, vannisomeya nwarakhani.
Wòkiseryani, vanniphwanela wòsuwelihani wìra epuruma-puruma ela enkhumelela mwaha wa mwáthanle ovinre mwèri wa Outúpuru (9/10) vattharelanaka ni wòkotthiwa wa Elvino Dias vamosá ni Paulo Guambe yàri mapolítiku a PODEMOS yàwo yòkotthiwe Omaputo n’atthu ahisuweliwe mpakha vá, mahiku yéttaka 19 mwèri wa Outúpuru mwàkha yòla wa 2024, Omaputo.
Nnya, mpakha vá Venâncio Mondlane namwòvahereri a PODEMOS onikupali wìra omuxintta mwáthanle, onrwa àtumereryaka axirikh’awe wìra ehihiyereriwe owanela exariya ya mwáthanle mpakha mahóleli onweliha ehitxe yàkhiwàwe ni Frelimo. Nnya, Muhupi wa mamisionáriyu a Daniel Comboni onnilompela wìra anamalaleya óthène ekhalé òwúràna elipiheryaka wámini ni ewèttelaka akhili ni elompelaka murettele wìra oxinttiwe owanawana onònaneya vano.
Kant de Voronha
