Anamphula àmulaxerya Namukuttho ni Mulipa a epolítika ya MDM

Wámphula, Omosampìkhi — Namukuttho Fernão Magalhães, àri-tho namwìvahereri okhala Kuvernatoro a Wámphula attharihaka nikhuru na Movimento Democrático de Moçambique (MDM), ophwanyiwe okhwíyène mpá mwawe muttetthe wa Onamutekeliwa, epòma ya Wámphula, mutivela wòkiserya (9/11). Anamuntxène annànyiherya itthu sintxène sinlupànyereya nnamukhwa ene yòla okhala wìra Namukuttho Fernão ákhala mekhawe ni ophwanyiwe ni murokorawe aiwkhwenlène, màna khàkhumela vate. Numala ovolowa mpá mwawe mahithi awe yàphwanyiwe ephirikeyenle vathi òwúmène.

Sintoko vasuwelinhàwe murokorawe Fernão, vàhiweryaneya osuweliwa okhwa wawe numalá ohiweryaneya omwàttakela eyàpelano awe. “Kàhitikinihiwa okhala wìra vaxákaru apátiri yànikhuma enikhomasa enatthikela mpàni. Masi olelo hòye. Ntoko kahinvekela mmiravo aka wìra àthurumele mpàni, masi mukhora wàhiwaleya. Yèna vavinryàwe opithela khuvolowa mpàni tivó naphwannyàhu yumme vatthayani”, òsuweliha murokorawe Fernão.

Okhwa wawe Namukuttho Fernão Magalhães, mutthu òttittimiheya mukerexa ni mmawàni mwaivaherenryàwe wéttela epolítika, wòkumiha epurumapuruma mulaponi móthène mwaha wóthanla epartìtu ya MDM. Nnya, Xakartàri a MDM, Leonor Lopes, òsuweliha wìra okhwá wa Namukuttho ole kholuluwanne ni muteko wa epolítika. “Munn’ihu àrwa anlanaka eròho yanwereya. Vano khivanrérela otthyawelela etthu ekina”, óhimya Leonor Lopes, yòwo tho ottottopenle wìra MDM òmuyelela namarumeya òroromeleya: “Nòmuyelèla musuweli òsareya ankhili ni miruku”.

 Mukuttho wòmulaxerya Fernão oKateteràle

Variyari va wunla ni oxanka, mukuttho wòkaristiya wiraneñye Eparókiya yokateteràle ya Wámphula, enamanli (12/11) yàhàthukumanya apatthani, amusi, mapátiri mantxène, atthu a epolítika ni anamanloko òhàlikeleya. Okathi wòtaphulela sósoma, Píxipu Inácio Saúre, a Arkitiyosèse ya Wámphula, òttottopela wámini ni murérelo wa muteko wènamukuttho ovariwe ni Pátiri Fernão, vòniheryaka wìra okhwa wawe mwírìrya wa Muluku. “Otthuna wa Muluku ophavela murérelo mùlupalexa, nave vano pátiri Fernão ompatxerya olelo okhala mòvuwani mwa Muluku”, òlipiherya Saúre, àkurunuxaka murima alipa-òkhweliwa.

 Mahithi

Numalá mukuttho Wòkaristiya, mahithi yàhirowaniwa mahiye anvithiwa mapátiri a Wámphula, mmathalani mwa Seminário Propedêutico Mater Apostolorum, weiwo anamuntxène yàhuruwenlyàya ni othunku. Okathi wàvithiwàya murutthu wa Pátiri Fernão akina kamosa-kamosa yaninla vòhimàliheya-vo akina yìkhupanyeryaka ni othunku. Masi yàhikhala-tho ale yàxukhuru sóthène sikhumelenle ehimyaka wìra pátiri Fernão “àri mulopwana òwámini nave okhwa wawe ti wòmoriha ikharari, masi onkela wùpuweliwaka muróhoni mwa khula mutthu àmusuwela”.

Mapátiri a Wámphula ni Ophempa àmuttottopela Fernão mmihupini mwaya. “Pátiri Fernão àri namòna ahu okathi wóthène munikhuruni na mapátiri ni mmakerexani”, òsuweliha Pátiri Serafim João, yòwo tho olipihenrye miteko sòwìlipiha ni nthiti na Pátiri Fernão arumélaka amakristu.

Kant de Voronha