Vânia Ermelinda Graciano
Elavulelo ela “otaphuwa w’òMosampìkhi ti wòsareya ephomé” ennùpuweliha erikarikelo aya wópola elapo n’atthu aya. Khivanrèra ovila otthara ephiro enópola okhuma mahiku avinre mpakha olelo vàva. Ntoko ninsuwelàhu ni wahala a mulaponi mu, elapo ya oMosampìkhi khirère owana ikhotto wìra yìtaphule. Yòpatxerya t’ile yìreliwa wòmoliwa wa apwitikisi ale yaikuxerenrye elapo ahu ila ntoko yawaya. Atthu ale a kolono khwòmolasiwa numala ekhotto ele evinre ni owelihiwa wa epanttera ya elapo, mwàkha wa 1975. Vòttharelana vaya, khukhumelela ekhotto y’axinna òMosampìkhi wenno, vàvo atthu a elapo emosaru yèla yaivananàya ntoko awanani, nnya ewaneliwaka etemokarsia. Ekhotto ela khirère ohonona mirérelo seiye kolono sàhiyalyàwe ni khuwìvakasa atthu antxène, okhuma mwàkha wa 1976 mpakha mwàkha wa 1992. Vàvo yàwanàya anakhotto a Frelimo ni Renamo. Numala ekhotto ela vàniphaveleya wíràna w’atthu óthène ni olevelelana mwa sóthène iye sàkhumelenle ni okeliherya ohòlo munnuwelo n’òruwerya wa elapo.
Masi nto etthu enònaneya okhalaka wìra owela wa epanttera khurúhele otaphuwa wèkékhayi w’anammawàni. Nrivo nsina nòtaphuwa, khuwávovo otaphuwa. Nnihimya sìsa, okhala wìra nlelo va atthu òMosampìkhi khapunhe mukhalelo wa otaphuwa waya. Atthu antxène nlelo kharina ihakhi sa opinátamu aya ni okhala waya atthu a elapo yèla. Etthu ila ennirùha manyakunyaku ni ovalàna w’anammuttettheni. Asuweli ni asomi antxène a okathi ahu ola, ntoko Achille Mbembe annihimya wìra wópowa wa ekékhayi ninlèlo etthu yòphaveleyaxa w’Áfrika, nto vantxénexa wópowa variyari va muhakhu ni muruweryo. Etthu ela enikhala sìsa okhala wìra ákhala makhuru ni miyálàno iye sirina musurukhu ni sinàhasula ni wápottha atthu ehinawerya wìkhalela ni mmàleleyo. Ntoko sinónàhu, mukhaliheryo elapo ya oMosampìkhi onivahiwàya ni Epanko ya Mòlumwenkuni (Banco Mundial) vamosá ni Muhakhu wa Ilapo sóthène (FMI) onnintxererya ohàwa ni opotthiwa, ekhòttiheryaka elapo othanla etthu eniphavelàya nnakhala wìxéttiha ntoko simphwanelàya.
Etthu ela eryène sìso, okumihiwa wa mihakhu sa ephattu seiyo sinitumihiwa ni musurukhu muntxène wórùha mikhino-khino. Enimwi elapo ephavelaka okeleliha ohòlo oruwerya waya ni muhakhu aya, anammutthetteni antxène anikhala masikhini mùlupale, ohàwa onatepa wuntxerereya. Nave-tho mirérelo sa ephattu sinníyiwa, sihononaka elapo n’atthu aya anikhala memmo. Tivó nto, wópowa wòsareya ephomé onithónyerya wìkhanyànya w’atthu ale óthène aniphavela omaliha makhwankwa ni wìyeryana mulaponi-mu.
Sìso wópowa wa elapo ya oMosampìkhi onivira onànihiwaka ni ephomé. Mpantta mukina ikhotto, ekapatto ekina enkumiha wúkhuwa wa khula nihiku, niwanelaka ihakhi imosaru ni ottottela murárelo mirérelo sa mulaponi, nto vòhikhanyereriwa n’atthu a ilapo sòkhopela. Wópowa wa ekékhayi w’atthu a oMosampìkhi oniweryaneya atthu óthène yéttaka ntoko axinna ni esuwelaka ihakhi saya seiye sinàxuttiha okhala axinène elapo.
Nnya wópowa iwo waphiyá onniphwanela okasópiwa màna oniwerya ovonyokowa khuruhaka ohwa wulupale. Ti vavo nto vanìriwaya wìra, mukatxamiho mùlupale wa elapo ya oMosampìkhi orukunuxa makhalelo ala opotthana, khuruhela-vo mukhalelo wòphwanelela, mukhalelo oni wàsiveliheke anammawàni enikhala ni ohakalala ni otthapa, okhala wìra anrowa osuwelaka wìra elapo ni mihakhu saya ti s’atthu óthène. Sìsa vanrowa wìraneya nakhalanaru epolítika yóloka ni mùpuwelo wophentana ntoko axinna, nttittimihanaka ni wònelana vatthu mukina ni mukhwàwe. Níraru sìso elapo ahu enikhala yòtaphuwa ni atthu aya òtthapeleya. Nnàmwi eyiheñyène ephomé, masi atthu anókhala ntoko sinrèrelàya okhala n’ùtaphuwa.
