Alex Caetano

Elapo ahu yópatta mòro. Okhuma orevuma mpakha oMaputo, mwaha ori mmosá pàhi: Venâncio, evòtu, ekereve, Frelimo, CNE, Conselho Constitucional, píxipu Matsinhe. Atthu animópeliwa, akina khiyenviwa. Ipanttera txa Frelimo n’isèti sawe sinòpahiwa. Mwah’ola wóthène omphattuwa ni mwáthanle iraneñye mahiku 9 mwèri wa outúpuru eyàkha ya 2024. Mwésana àhikhala mwáthanle; yòwo nàthanlalyàhu ale anhólela imunisípiyu. Mwésana khiwárère onyakula. Onyakula omphattuwa ni mwaha wòwìyeryaniwa ivòtu.

Hata mitano, onyakula onvenya nipuro nenla. Atthu antxène aphwanyiwe yíyaka ivòtu. Atthu antxène avaraniwe ivòtu sówàtta. Ale arumiwe ohólela muteko wa mwáthanle, n’awo anthónyerya wìra ele enhimyàya khinroromeleya. Yàwo-tho, mwàno mwa muhóleli aya Píxipu Matsinhe, áhimya wìra ivòtu sa mwàkh’ola khasitaphuwale sánène. Sihìraneya itthu sòhiloka, masi CNE kharina etempo yòttharatthara itthu sóthène.

Okhuma vàvo, n’itthu sóthène atthu sònalyàya mahiku a mwáthanle, wòkhumelela onyakula: atthu ówàtta anhimya wìra okanyari wa Frelimo ni wa Chapo wìraneñye mwaha wòwíyiwa ivòtu. Atthu ówàtta anroromela wìra Venâncio tothanliwe. Mwaha yòl’ola wòwìyeryaniwa ivòtu, Venâncio n’ipartìtu sikina àlattula epuruma-puruma. Atthu antxène àrumélela. Kuvernu òvelavela. Atthu anvekela wìra makhulupale yókome ni evánele. Masi nisuweleke wìra khahiyo ephàwu-ru pàhi teninvaha ekumi mutthu: ekékhayi, ennivaha ekumi. Mapíxipu a ekeretxa katólika álepa epaphelo enilopolaka ni yàlopolaka atthu a kuvernu wìra ephavelexeke exariya ni ekékhayi.